Ål Bygdamuseum finn du litt opp frå Ål sentrum, oppover mot Øvre-Ål. På museumsområdet er det bygningar og gjenstandar frå ulike delar av Ål kommune.

Museet vart skipa i 1924 av Ål museumslag, med utgangspunkt i dei gamle husa på garden Leksvol. Etter kvart har det kome fleire bygningar og gjenstandar til museet.

Ål Bygdamuseum er delt inn i fire hovudområder: Leksvolgarden, det øvre tunet, stølen og husmannsplassen. På Leksvol står dei gamle gardshusa frå nordre Leksvol, som vart flytt til museumsområdet etter skipinga i 1924. Det øvre tunet er ei samling med einskilde, spesielle hus frå kommunen. Stølen er ei samling stølshus, og husmannsplassen viser dei husa som var mest vanleg på ein husmannsplass før i tida. Til saman er det 31 hus på museumsområdet. 

Kvart år er det familiedag på museet med konsert under Folkemusikkveka i slutten av mai. Museet har òg fleire slåtteenger, og eit av dei faste arrangementa er slåttedagen i juli. 

Ål Museumslag eig museet, og er òg venneforeininga til museet. Ål Bygdamuseum blir drive av Hallingdal Museum.